ಪುಣೆ :ಅಂತರ್ಜಾತಿ ವಿವಾಹ’ ಗಂಡನ ಕಾಲು ಮುರಿದು ಮಗಳನ್ನು ಎಳೆದೊಯ್ದ ಕುಟುಂಬಸ್ಥರು

ಪುಣೆ :ಅಂತರ್ಜಾತಿ ವಿವಾಹ’ ಗಂಡನ ಕಾಲು ಮುರಿದು ಮಗಳನ್ನು ಎಳೆದೊಯ್ದ ಕುಟುಂಬಸ್ಥರು

news.ashwasurya.in

ಅಶ್ವಸೂರ್ಯ/ಪುಣೆ: ಮಗಳು ಅಂತರ್ಜಾತಿ ವಿವಾಹವಾಗಿದ್ದಕ್ಕೆ ಸಿಟ್ಟಿಗೆದ್ದ ಕುಟುಂಬಸ್ಥರು ಗಂಡನ ಕಾಲು ಮುರಿದು, ಪತ್ನಿಯನ್ನು ಎಳೆದೊಯ್ದ ಘಟನೆ ಪುಣೆ ಜಿಲ್ಲೆಯ ಖೇಡ್ ತಾಲೂಕಿನಲ್ಲಿ ನಡೆದಿದೆ. ಅಂತರ್ಜಾತಿ ವಿವಾಹದ ಆರೋಪದ ಮೇಲೆ 43 ವರ್ಷದ ವ್ಯಕ್ತಿಯ ಮೇಲೆ ಅತ್ತೆ-ಮಾವ ಸೇರಿದಂತೆ ಏಳೆಂಟು ಜನರ ಗುಂಪೊಂದು ಮನಬಂದಂತೆ ಹಲ್ಲೆ ನಡೆಸಿ ಮಹಿಳೆಯನ್ನ ಎಳೆದುಕೊಂಡು ಹೋಗಿದ್ದಾರೆ ಎಂದು ವರದಿಯಾಗಿದೆ. ಆರೋಪಿಗಳು ಕಣ್ಮರೆಯಾಗಿದ್ದಾರೆ.

ಈ ಘಟನೆ ಭಾನುವಾರ (ಆಗಸ್ಟ್ 3) ಮಧ್ಯಾಹ್ನ 1.15 ರ ಸುಮಾರಿಗೆ ಮಂದವಾಲ ಗ್ರಾಮದಲ್ಲಿ ನಡೆದಿದೆ. ಆರೋಪಿಗಳನ್ನು ಅಕ್ಷಯ್ ಅಲಿಯಾಸ್ ಗಣೇಶ್ ರಾಜಾರಾಮ್ ಕಾಶಿದ್, ಬಂಟಿ ಕಾಶಿದ್, ಸುಶೀಲಾ ರಾಜಾರಾಮ್ ಕಾಶಿದ್ ಮತ್ತು 15 ರಿಂದ 16 ಅಪರಿಚಿತ ವ್ಯಕ್ತಿಗಳು ಎಂದು ಗುರುತಿಸಲಾಗಿದೆ.
ಪೊಲೀಸರ ಪ್ರಕಾರ ದೂರುದಾರ ಮಂದಾವಾಲಾದ ಹಾರ್ಡ್‌ವೇರ್ ಅಂಗಡಿ ಮಾಲೀಕ ವಿಶ್ವನಾಥ್ ಬಬನ್ ಗೋಸಾವಿ, ಆಗಸ್ಟ್ 5, 2024 ರಂದು ಆಳಂದಿಯಲ್ಲಿ ಪ್ರಜಕ್ತಾ ರಾಜಾರಾಮ್ ಕಾಶಿದ್ (28) ವಯಸ್ಸಿನ ಯುವತಿನ್ನು ವಿವಾಹವಾದರು. ಇದು ಅಂತರ್ಜಾತಿ ವಿವಾಹವಾಗಿದ್ದರಿಂದ ಮಹಿಳೆಯ ಕುಟುಂಬಸ್ಥರು ಈ ಮದುವೆಯನ್ನು ಒಪ್ಪಿರಲಿಲ್ಲ. ಮದುವೆಯ ನಂತರ ಮಹಿಳೆಯ ಕುಟುಂಬವು ಸಿಟ್ಟಿಗೆದ್ದಿದ್ದರು.
ಎಫ್‌ಐಆರ್ ಪ್ರಕಾರ ಗೋಸಾವಿ ಪತ್ನಿಯನ್ನು ಆಕೆಯ ಸಹೋದರ ಅಕ್ಷಯ್, ಸೋದರಸಂಬಂಧಿ ಬಂಟಿ, ತಾಯಿ ಸುಶೀಲಾ ಮತ್ತು ಸುಮಾರು 15 ರಿಂದ 16 ಅಪರಿಚಿತ ವ್ಯಕ್ತಿಗಳು ಎಳೆದುಕೊಂಡು ಹೋಗಿ ಹಲ್ಲೆ ನಡೆಸುತ್ತಿರುವುದನ್ನು ನೋಡಿದ್ದಾರೆ. ದಾಳಿಕೋರರು ಆಕೆಯ ಕೂದಲು ಮತ್ತು ಕೈಗಳನ್ನು ಹಿಡಿದು ಮೆಟ್ಟಿಲುಗಳಿಂದ ಕೆಳಗೆ ಎಳೆದಿದ್ದಾರೆ ಎಂದು ಆರೋಪಿಸಲಾಗಿದೆ, ಆದರೆ ಆಕೆ ಸಹಾಯಕ್ಕಾಗಿ ಕೂಗುತ್ತಿದ್ದಳು.

ಗೋಸಾವಿ ಅವರನ್ನು ತಡೆಯಲು ಪ್ರಯತ್ನಿಸಿದಾಗ, ಮರದ ಕೋಲುಗಳು ಮತ್ತು ಲೋಹದ ಸರಳುಗಳಿಂದ ಹಲ್ಲೆ ನಡೆಸಿದ್ದಾರೆ ಎನ್ನಲಾಗಿದೆ. ಗೋಸಾವಿ ಅವರ ಕಾಲಿಗೆ ಗಂಭೀರ ಗಾಯಗಳಾಗಿದ್ದು, ಕಾಲಿನ ಮೂಳೆ ಮುರಿದಿದೆ ಎಂದು ಹೇಳಲಾಗಿದೆ. ನಂತರ ಪಿಂಪ್ರಿ-ಚಿಂಚ್‌ವಾಡ್‌ನ ವೈಸಿಎಂ ಆಸ್ಪತ್ರೆಗೆ ಅವರನ್ನು ದಾಖಲಿಸಲಾಗಿದೆ. ಸಾಕ್ಷಿಗಳು ಮತ್ತು ಮಧ್ಯಪ್ರವೇಶಿಸಲು ಪ್ರಯತ್ನಿಸಿದ ಇತರರ ಮೇಲೂ ಹಲ್ಲೆ ನಡೆಸಲಾಗಿದೆ ಎಂದು ಆರೋಪಿಸಲಾಗಿದೆ. ಅವರನ್ನು ವಿರೋಧಿಸಿದರೂ, ಆರೋಪಿಗಳು ಪ್ರಜಕ್ತಾಳನ್ನು ಬಲವಂತವಾಗಿ ಅಪಹರಿಸಿ, ಎಸ್‌ಯುವಿ ಮತ್ತು ಇತರ ವಾಹನಗಳಲ್ಲಿ ಸ್ಥಳದಿಂದ ಎಳೆದುಕೊಂಡು ಪರಾರಿಯಾಗಿದ್ದಾರೆ.

ಖೇಡ್ ಪೊಲೀಸ್ ಠಾಣೆಯ ಸಹಾಯಕ ಪೊಲೀಸ್ ನಿರೀಕ್ಷಕಿ ಸ್ನೇಹಲ್ ರಾಜೆ, ಮಾತನಾಡಿ, “ಸಂತ್ರಸ್ತರು ಮತ್ತು ಆರೋಪಿಗಳು ಒಂದೇ ಪ್ರದೇಶದವರು. ಅಂತರ್ಜಾತಿ ವಿವಾಹದ ಹಿನ್ನೆಲೆಯಲ್ಲಿ ಈ ಘಟನೆ ನಡೆದಿದೆ. ಪ್ರಜಕ್ತಾಳ ಕುಟುಂಬ ಕಳೆದ ಕೆಲವು ತಿಂಗಳುಗಳಿಂದ ಆಕೆಯನ್ನು ಮರಳಿ ಕರೆತರಲು ಪ್ರಯತ್ನಿಸುತ್ತಿತ್ತು, ಆದರೆ ಆಕೆ ಅದನ್ನು ನಿರಾಕರಿಸುತ್ತಿದ್ದರು. ಗೋಸಾವಿ ಅಲೆಮಾರಿ ಬುಡಕಟ್ಟು ಸಮುದಾಯಕ್ಕೆ ಸೇರಿದವರಾಗಿದ್ದರೆ, ಪ್ರಜಕ್ತ ಮರಾಠಿ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ.
“ಆರೋಪಿಗಳು ಬಿದಿರಿನ ಕೋಲುಗಳಿಂದ ದೂರುದಾರರ ಕಾಲು ಮುರಿದಿದ್ದಾರೆ. ಅವರಿಗೆ ವೈದ್ಯಕೀಯ ಚಿಕಿತ್ಸೆ ನೀಡಲಾಗುತ್ತಿದೆ. ಆರೋಪಿಗಳು ಪರಾರಿಯಾಗಿದ್ದಾರೆ. ನಾವು ಅವರನ್ನು ಗುರುತಿಸಿದ್ದೇವೆ ಮತ್ತು ಶೀಘ್ರದಲ್ಲೇ ಅವರನ್ನು ಬಂಧಿಸಲಾಗುವುದು. ಇದಲ್ಲದೆ, ಈ ವಿಷಯ ತನಿಖೆಯಲ್ಲಿದೆ. ಖೇಡ್ ಪೊಲೀಸ್ ಠಾಣೆಯಲ್ಲಿ ಭಾರತೀಯ ನ್ಯಾಯ ಸಂಹಿತಾ ಸೆಕ್ಷನ್ 140(3), 118(1), 115(2), 189(1), 189(2), 189(4), 191(2), 191(3), 351(2), 351(3) ಮತ್ತು 352 ರ ಅಡಿಯಲ್ಲಿ ಪೊಲೀಸರು ದೂರು ದಾಖಲಿಸಿಕೊಂಡು ತನಿಖೆಗೆ ಮುಂದಾಗಿದ್ದಾರೆ.