ಶಿವಮೊಗ್ಗ : ಶೂ ಒಳಗಿತ್ತು ಹಾವು.! ಮುಂದೇನಾಯ್ತು.?
news.ashwasurya.in
ಅಶ್ವಸೂರ್ಯ/ಶಿವಮೊಗ್ಗ : ಮನೆಯ ಹೊರಭಾಗದ ಚಪ್ಪಲಿ ಬಿಡುವ ಜಾಗದಲ್ಲಿ ಶೂ ಒಳಗೆ ಹಾವೊಂದು ಅಡಗಿಕೊಂಡಿದ್ದ ಘಟನೆ ಶಿವಮೊಗ್ಗ ನಗರದ ವಿದ್ಯಾನಗರದ ಕಂಟ್ರಿಕ್ಲಬ್ ರಸ್ತೆಯ ಮನೆಯೊಂದರ ಬಳಿ ನಡೆದಿದೆ. ವೆಂಕಟೇಶ್ ಎಂಬುವರ ಮನೆಯಲ್ಲಿ ಘಟನೆ ನಡೆದಿದ್ದು. ಮನೆ ಹೊರ ಭಾಗದಲ್ಲಿದ್ದ ಚಪ್ಪಲಿ ಸ್ಟ್ಯಾಂಡ್ ಬಳಿ ಬಿಡಲಾಗಿದ್ದ ಶೂ ಒಳಗೆ “ಕ್ಯಾಟ್ ಸ್ನೇಕ್” ಜಾತಿಗೆ ಸೇರಿದ ಹಾವು ನಗರದಲ್ಲಿ ವಿಪರೀತ ಮಳೆಯ ಹಿನ್ನೆಲೆಯಲ್ಲಿ ಬೆಚ್ಚಗಿನ ಜಾಗ ಹುಡುಕಿ ಸೇರಿಕೊಂಡಿತ್ತು.
ಶೂ ಒಳಗೆ ಹಾವು ಸೇರಿಕೊಂಡಿರುವುದನ್ನು ಗಮನಿಸಿದ ಮನೆಯವರು, ಉರಗ ಸಂರಕ್ಷಕ ಸ್ನೇಕ್ ಕಿರಣ್ ಅವರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕಾಗಮಿಸಿದ ಕಿರಣ್ ಅವರು ಸುರಕ್ಷಿತವಾಗಿ ಹಾವನ್ನು ಸಂರಕ್ಷಿಸಿದ್ದಾರೆ.
ಸದರಿ ಹಾವು “ಕ್ಯಾಟ್ ಸ್ನೇಕ್” ಆಗಿದ್ದು ವಿಷ ರಹಿತ ವರ್ಗಕ್ಕೆ ಸೇರಿದ್ದಾಗಿದೆ. ಮಳೆಗಾಲದ ವೇಳೆ ಹಾವುಗಳು ಬೆಚ್ಚಗಿನ ಜಾಗ ಹುಡುಕಿಕೊಂಡು ಬರುತ್ತವೆ. ಮನೆ ಹೊರಭಾಗ ಬಿಟ್ಟಿರುವ ಶೂಗಳನ್ನು ಹಾಕಿಕೊಳ್ಳುವ ವೇಳೆ, ಪರಿಶೀಲಿಸಿ ಹಾಕಿಕೊಳ್ಳಬೇಕು’ ಎಂದು ಉರಗ ಸಂರಕ್ಷಕ ಸ್ನೇಕ್ ಕಿರಣ್ ಅವರು ಎಚ್ಚರಿಸಿದ್ದಾರೆ.
