ಗಯಾ: ಮಹಿಳಾ ಸಬ್ ಇನ್ಸ್ಪೆಕ್ಟರ್, ಪುರುಷ ಇನ್ಸ್ಪೆಕ್ಟರ್ ಲವ್ ಸ್ಟೋರಿ.! ವಿಡಿಯೋ ಕಾಲ್ ಮಾಡಿ ಆತ್ಮಹತ್ಯೆಗೆ ಶರಣಾದ ಇನ್ಸ್ಪೆಕ್ಟರ್.!
news.ashwasurya.in
ಅಶ್ವಸೂರ್ಯ/ಗಯಾ : ಗಯಾದಲ್ಲಿ ಇನ್ಸ್ಪೆಕ್ಟರ್ ಅನುಜ್ ಕಶ್ಯಪ್ ಆತ್ಮಹತ್ಯೆ ಪ್ರಕರಣದಲ್ಲಿ ಮಹಿಳಾ ಎಸ್ಐ ಸ್ವೀಟಿ ಕುಮಾರಿ ಬಂಧನ. 24 ಗಂಟೆಯ ವಿಚಾರಣೆಯಲ್ಲಿ ಮದುವೆ ಒತ್ತಡ ಮತ್ತು ಮಾನಸಿಕ ಕಿರುಕುಳ ಆರೋಪ. ಇನ್ಸ್ಪೆಕ್ಟರ್ ಆತ್ಮಹತ್ಯೆ , ಮಹಿಳಾ ಎಸ್ಐ ಬಂಧನ.!
ಗಯಾದಲ್ಲಿ ಸಬ್-ಇನ್ಸ್ಪೆಕ್ಟರ್ ಅನುಜ್ ಕಶ್ಯಪ್ರ ಆತ್ಮಹತ್ಯೆ ಪ್ರಕರಣಕ್ಕೆ ಬಿಗ್ ಟ್ವಿಸ್ಟ್ ಸಿಕ್ಕಿದೆ. 24 ಗಂಟೆಗಳ ವಿಚಾರಣೆಯ ನಂತರ, ಪೊಲೀಸರು ಮಹಿಳಾ ಸಬ್-ಇನ್ಸ್ಪೆಕ್ಟರ್ ಸ್ವೀಟಿ ಕುಮಾರಿಯವರನ್ನು ಮಾನಸಿಕ ಕಿರುಕುಳ ಮತ್ತು ಮದುವೆಗೆ ಒತ್ತಡ ಹೇರಿದ ಆರೋಪದ ಮೇಲೆ ಬಂಧಿಸಿ ಜೈಲಿಗೆ ಕಳುಹಿಸಿದ್ದಾರೆ.!
ಇಬ್ಬರ ನಡುವೆ ಪ್ರೀತಿ.?
2021ರಲ್ಲಿ ಇಮಾಮ್ಗಂಜ್ ಪೊಲೀಸ್ ಠಾಣೆಯಲ್ಲಿ ಮೊದಲು ಭೇಟಿಯಾದ ಅನುಜ್ ಕಶ್ಯಪ್ ಮತ್ತು ಸ್ವೀಟಿ ಕುಮಾರಿ, ಕೆಲಸದ ಸಂದರ್ಭದಲ್ಲಿ ಆಪ್ತರಾದರು. ಕ್ರಮೇಣ ಅವರ ಸಂಬಂಧ ಪ್ರೀತಿಯಾಗಿ ಬದಲಾವಣೆಯಾಗಿತ್ತು. ಒಟ್ಟಿಗೆ ತಿರುಗಾಡುವುದು, ರೆಸ್ಟೋರೆಂಟ್ಗಳಲ್ಲಿ ಕಾಲ ಕಳೆಯುವುದು ಸಾಮಾನ್ಯವಾಗಿತ್ತು. ಆದರೆ, ಈ ಸಂಬಂಧದ ಬಗ್ಗೆ ಹಿರಿಯ ಪೊಲೀಸ್ ಅಧಿಕಾರಿಗಳಿಗೆ ಮಾಹಿತಿ ಸಿಕ್ಕಾಗ, ಇಬ್ಬರನ್ನು ಬೇರೆ ಬೇರೆ ಸ್ಥಳಗಳಿಗೆ ವರ್ಗಾವಣೆ ಮಾಡಿದ್ದರು. ಅನುಜ್ರನ್ನು ಎಸ್ಎಸ್ಪಿ ಕಚೇರಿಯ ಮೀಡಿಯಾ ವಿಭಾಗಕ್ಕೆ, ಸ್ವೀಟಿಯನ್ನು ಬೆಳಗಂಜ್ ಠಾಣೆಗೆ ವರ್ಗಾವಣೆ ಮಾಡಿ ಆದೇಶ ನೀಡಲಾಗಿತ್ತು. ಇದರೊಂದಿಗೆ ಇಬ್ಬರ ನಡುವಿನ ಪ್ರೀತಿ ದೂರವಾಗಿತ್ತು.
ಪ್ರೇಮಕಥೆಯ ದುರಂತ ಅಂತ್ಯ.!?
ಇತ್ತ ಕುಟುಂಬಸ್ಥರು ಒಂದು ಯುವತಿಯನ್ನು ನೋಡಿ ಅನುಜ್ ಕಶ್ಯಪ್ ಅವರಿಗೆ ಮದುವೆ ಮಾಡಿದ್ದರು. ಇಬ್ಬರಿಗೂ ಮದುವೆಯಾಗಿ ಎರಡು ವರ್ಷಗಳಾಗಿತ್ತು. ಆದರೆ ಅನುಜ್ ಕಶ್ಯಪ್ ಪತ್ನಿ ದೆಹಲಿಯಲ್ಲಿ ಉಳಿದುಕೊಂಡು ಯುಪಿಎಸ್ಸಿಗೆ ತಯಾರಿ ನಡೆಸುತ್ತಿದ್ದರು. ಅನುಜ್ ಮಾತ್ರ ಗಯಾದ ಬಾಡಿಗೆ ಮನೆಯಲ್ಲಿ ಒಂಟಿಯಾಗಿ ವಾಸಿಸುತ್ತಿದ್ದರು.
ಈ ನಡುವೆ ಸ್ವೀಟಿ ಕುಮಾರಿ ಹಾಗೂ ಅನುಜ್ ಕಶ್ಯಪ್ ನಡುವಿನ ಸಂಭಾಷಣೆ ಆರಂಭವಾಗಿತ್ತಂತೆ. ಸ್ವೀಟಿ, ಅನುಜ್ರ ಪತ್ನಿಗೆ ವಿಚ್ಛೇದನ ನೀಡಿ ತನ್ನನ್ನು ಮದುವೆಯಾಗುವಂತೆ ಒತ್ತಡ ಹೇರುತ್ತಿದ್ದರಂತೆ. ಈ ಒತ್ತಡವನ್ನು ತಾಳಲಾರದ ಅನುಜ್, ಗುರುವಾರ ರಾತ್ರಿ ಸ್ವೀಟಿಯೊಂದಿಗೆ ವಿಡಿಯೋ ಕಾಲ್ ನಲ್ಲಿ ಮಾತನಾಡುತ್ತಿರುವಾಗಲೇ, ಫ್ಯಾನ್ಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಈ ಘಟನೆಯ ನಂತರ, ಸ್ವೀಟಿ ಭಯಭೀತಳಾಗಿ ಬೆಳಗ್ಗೆ 5 ಗಂಟೆಗೆ ಅನುಜ್ರ ಬಾಡಿಗೆ ಮನೆಗೆ ಆಗಮಿಸಿದ್ದಾರೆ. ಆದರೆ ಬಾಗಿಲು ಓಪನ್ ಮಾಡಲು ಆಗದಿದ್ದಾಗ, ಮನೆ ಮಾಲೀಕರಿಗೆ ಪೊಲೀಸರಿಗೆ ಮಾಹಿತಿ ನೀಡಿದ್ದರು.ಸ್ಥಳಕ್ಕೆ ಬಂದ ಪೊಲೀಸರು ಡೋರ್ ಒಡೆದು ಒಳ ಪ್ರವೇಶ ಮಾಡಿದ್ದು, ಮೃತದೇಹ ಪತ್ತೆಯಾಗಿದೆ. ಇನ್ನು, ಪೊಲೀಸರು ವಿಚಾರಣೆಯಲ್ಲಿ ಸ್ವೀಟಿ, ಇಬ್ಬರ ನಡುವಿನ ಸಂಬಂಧದ ಬಗ್ಗೆ ಮಾಹಿತಿ ನೀಡಿದ್ದು, ಮದುವೆ ಮಾಡಿಕೊಳ್ಳುವಂತೆ ಒತ್ತಾಯ ಮಾಡುತ್ತಿರುವುದು ಕೂಡ ಸತ್ಯ ಎಂದು ಒಪ್ಪಿಕೊಂಡಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿದೆ. ಅನುಜ್ರ ತಂದೆ ಕೂಡ ಸ್ವೀಟಿ ಕಿರುಕುಳ ನೀಡುತ್ತಿದ್ದರು ಎಂದು ಆರೋಪಿಸಿದ್ದಾರೆ. ಪೊಲೀಸರು ಸ್ವೀಟಿಯನ್ನು ಬಂಧಿಸಿ, ವಿಚಾರಣೆಗೆ ಒಳಪಡಿಸಿದ್ದಾರೆ.
