ಬೆಂಗಳೂರಿನಲ್ಲಿ ಮದುವೆಗೆ ಇನ್ನೇನು ಕೆಲವೇ ದಿನಗಳು ಬಾಕಿಯಿರುವಾಗಲೇ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಸಿಂಧೂಶ್ರೀ ಎಂಬ ಯುವತಿ ದಾರುಣವಾಗಿ ಮೃತಪಟ್ಟಿದ್ದಾರೆ. ಅರಿಶಿಣ ಶಾಸ್ತ್ರದ ಸಂಭ್ರಮದಲ್ಲಿ ಮಿಂದೇಳಬೇಕಿದ್ದ ಮಗಳು ಮಸಣ ಸೇರಿದ್ದನ್ನು ಕಂಡು ಆಕೆಯ ತಂದೆ ನಂಜುಂಡಪ್ಪ ತೀವ್ರ ದುಃಖದಿಂದ ಕಣ್ಣೀರಿಟ್ಟಿದ್ದಾರೆ…
ಬೆಂಗಳೂರು : ಅರಿಶಿಣ ಶಾಸ್ತ್ರ ಮಾಡಬೇಕಿದ್ದ ಮಗಳು ಮಸಣ ಸೇರೊ ಹಾಗಾಯ್ತು – ಮಗಳ ನೆನೆದು ಕಣ್ಣಿರು ಹಾಕಿದ ತಂದೆ.!
news.ashwasurya.in
ಅಶ್ವಸೂರ್ಯ | ಬೆಂಗಳೂರು : ಇವತ್ತು ಮಗಳ ಅರಿಶಿಣ ಶಾಸ್ತ್ರ ಮಾಡಬೇಕಿತ್ತು. ಆದರೆ ಅವಳ ತಿಥಿ ಮಾಡುವ ಹಾಗಾಯ್ತು ಎಂದು ಅಪಘಾತದಲ್ಲಿ ಮೃತಪಟ್ಟ ಸಿಂಧೂಶ್ರೀ ತಂದೆ ನಂಜುಂಡಪ್ಪ ಅವರು ಮಗಳ ನೆನೆದು ಕಣ್ಣೀರು ಹಾಕಿದ್ದಾರೆ.
ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು,ಅಪ್ಪ ಲಾಸ್ಟ್ ಒಂದೇ ಒಂದು ಪತ್ರಿಕೆ ಕೊಟ್ಟಿ ಬರ್ತಿನಿ ಅಂತಾ ಹೋಗಿದ್ಲು. ಆದ್ರೆ ಈ ಥರ ಆಗೋಯ್ತು. ಇವತ್ತು ಅವಳ ಅರಶಿಣ ಶಾಸ್ತ್ರದ ಕಾರ್ಯಕ್ರಮ, ನಾಳೆ ಬಳೆ ಶಾಸ್ತ್ರ. ನಾವೆಲ್ಲರೂ ಚೌಟ್ರಿಗೆ ಹೋಗಬೇಕಿತ್ತು. ಆದರೆ ಎಲ್ಲಾ ಮುಗಿದೋಯ್ತು. ಕನಸುಗಳು ನುಚ್ಚುನೂರಾಯ್ತು ನನ್ನ ಮಗಳ ತಿಥಿ ಮಾಡೋ ಹಾಗಾಯ್ತು. ದೊಡ್ಡ ಟ್ರಕ್ ಅದು. ನನಗೆ ಒಬ್ಬಳೇ ಮಗಳು. ಇನ್ನೊಬ್ಬಳು ನನ್ನ ತಂಗಿ ಮಗಳು ಎಂದು ಭಾವುಕರಾಗಿದ್ದಾರೆ.
ಟ್ರಕ್, ಗೂಡ್ಸ್ ವಾಹನಗಳಿಗೆ ರೂಲ್ಸ್ ತರಬೇಕು. ನವ ವಧು ಸಾವಿಗೆ ಟ್ರಕ್ ಕಾರಣ ಆಯ್ತು. ಟ್ರಕ್‌ಗಳು ಸಿಟಿಯಲ್ಲಿ ಹಗಲಿನ ಹೊತ್ತಿನಲ್ಲಿ ಎಂಟ್ರಿ ಇಲ್ಲ ಅಂತಾರೆ. ಕಾನೂನಿನ ಪ್ರಕಾರ ಪೊಲೀಸರು ಟ್ರಕ್ ಅನ್ನ ತಡೆದಿದ್ರೆ ಈ ರೀತಿ ಆಗ್ತಿರಲಿಲ್ಲ. ಇಬ್ಬರ ಜೀವ ಹೋಗಿದೆ. ಪೊಲೀಸರು ಕಾನೂನು ಕ್ರಮ ಕೈಗೊಳ್ಳಬೇಕಿತ್ತು ಎಂದು ಮೃತಳ ಸಂಬಂಧಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇದೇ ವೇಳೆ ಸಂಬಂಧಿಕ ಶಂಕ್ರಪ್ಪ ಮಾತನಾಡಿ, ಅವರ ತಂದೆ ಆಟೋ ಡ್ರೈವರ್. 20 ವರ್ಷದಿಂದ ಅವ್ರು ಇಲ್ಲೇ ಇದ್ರು. ಮದುವೆ ಎಲ್ಲಾ ಸಂಬಂಧಿಕರು ಹೊರ ಊರಿನಿಂದ ಬಂದಿದ್ರು. ಅವರ ಅಮ್ಮ ಊರಿಗೆ ಬಂದಿದ್ರು. ಇವ್ರೂ ಊರಿಗೆ ಬರಬೇಕಿತ್ತು. ಸ್ನೇಹಿತೆ ಒಬ್ಬಳಿಗೆ ಕಾರ್ಡ್ ಕೊಡೋದು ಮಿಸ್ ಆಗಿದೆ ಅಂತಾ ಪಕ್ಕದ ಮನೆಯವರ ಬೈಕ್ ತೆಗೆದುಕೊಂಡು ಕಾರ್ಡ್ ಕೊಡೋಕೆ ಹೋಗ್ತಿದ್ರು. ಟ್ರಕ್ ಅವ್ನು ಬ್ರೇಕ್ ಹಾಕಿದ್ರೆ ಬದುಕುತ್ತಿದ್ರು. ಒಬ್ರ ತಲೆ ಮೇಲೆ ಹರಿದಿದೆ, ಮತ್ತೊಬ್ರ ಮೈಮೇಲೆ ಹರಿದಿದೆ. ಮದುವೆ ಕಾರ್ಯಕ್ರಮ ಇತ್ತು. ಆದ್ರೆ ಈ ರೀತಿ ಆಗಿದೆ ಎಂದು ಹೇಳಿದ್ದಾರೆ.
ಸದ್ಯ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಮೃತ ವಧು ಸಿಂಧೂಶ್ರೀ ಮತ್ತು ವಿದ್ಯಾ ಮರಣೋತ್ತರ ಪರೀಕ್ಷೆ ನಡೆಯುತ್ತಿದ್ದು, ಮಾರ್ಚರಿ ಬಳಿ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ. ಮಗಳನ್ನ ನೆನೆದು ತಾಯಿ, ಅಕ್ಷತೆ ಕಾಳು ಹಾಕಬೇಕಿತ್ತು. ಮಗಳಿಗೆ ಅಕ್ಕಿಕಾಳು ಹಾಕುವ ಪರಿಸ್ಥಿತಿ ಬಂದಿದೆ ಎಂದು ಕಣ್ಣೀರು ಹಾಕಿದ್ದಾರೆ. ಮದುವೆ ಮಂಟಪಕ್ಕೆ ಬರಬೇಕಿದ್ದ ಸಂಬಂಧಿಕರನ್ನು ವಿಧಿ ಮಾರ್ಚರಿಗೆ ಕರೆತಂದಿದೆ. ಇತ್ತ ಮದುವೆ ಸಂಭ್ರಮದಲ್ಲಿ ಭಾಗಿಯಾಗಬೇಕಿದ್ದವರು ಸೂತಕದಲ್ಲಿ ಭಾಗಿಯಾಗಿದ್ದಾರೆ.
ಸದ್ಯ ಟ್ರಕ್ ಚಾಲಕನಿಗಾಗಿ ಬ್ಯಾಟರಾಯನಪುರ ಸಂಚಾರ ಪೊಲೀಸರು (Byatarayanapura Police) ಹುಡುಕಾಟ ನಡೆಸಿದ್ದು, ತನಿಖೆ ಮುಂದುವರಿದಿದ್ದು..ಮದುವೆ ಸಂಭ್ರಮದಲ್ಲಿದ್ದ ಮನೆಯಲ್ಲಿ ಮಸಣದ ಮೌನ ಆವರಿಸಿದ್ದು ದುರಂತವೆ ಹೌದು…
