ಶಿವಮೊಗ್ಗ : ಹಿರಿಯ ಪತ್ರಕರ್ತ ಭಂಡಿಗಡಿ ನಂಜುಂಡಪ್ಪ ಇನ್ನಿಲ್ಲ! ಅಕ್ಷರಗಳೊಂದಿಗೆ ಬದುಕಿದ ಹಿರಿಯ ಜೀವಿ ಬಾರದೂರಿಗೆ… ಶಿವಮೊಗ್ಗ ಪತ್ರಿಕಾ ಲೋಕಕ್ಕೆ ತುಂಬಲಾರದ ನಷ್ಟ!

ಶಿವಮೊಗ್ಗ : ಹಿರಿಯ ಪತ್ರಕರ್ತ ಭಂಡಿಗಡಿ ನಂಜುಂಡಪ್ಪ ಇನ್ನಿಲ್ಲ! ಅಕ್ಷರಗಳೊಂದಿಗೆ ಬದುಕಿದ ಹಿರಿಯ ಜೀವಿ ಬಾರದೂರಿಗೆ… ಶಿವಮೊಗ್ಗ ಪತ್ರಿಕಾ ಲೋಕಕ್ಕೆ ತುಂಬಲಾರದ ನಷ್ಟ!

ಅಶ್ವಸೂರ್ಯ ನ್ಯೂಸ್ | ಶಿವಮೊಗ್ಗ

ಶಿವಮೊಗ್ಗ : ಶಕಗಳ ಕಾಲ ಅಕ್ಷರಗಳನ್ನೇ ಉಸಿರಾಗಿಸಿಕೊಂಡು, ಪತ್ರಿಕಾ ಧರ್ಮವನ್ನೆ ಬದುಕಿನ ಧ್ಯೇಯವಾಗಿಸಿಕೊಂಡಿದ್ದ ಹಿರಿಯ ಪತ್ರಕರ್ತ, ‘ವಾಯ್ಸ್ ಆಫ್ ಶಿವಮೊಗ್ಗ’ ಪತ್ರಿಕೆಯ ಸಂಪಾದಕರಾದ ಭಂಡಿಗಡಿ ನಂಜುಂಡಪ್ಪ (75) ಅವರು ಸೋಮವಾರ ಮಧ್ಯಾಹ್ನ ಇಹಲೋಕ ತ್ಯಜಿಸಿದ್ದಾರೆ. ಅವರ ಅಗಲಿಕೆಯ ಸುದ್ದಿ ಶಿವಮೊಗ್ಗದ ಪತ್ರಿಕಾ ವಲಯದಲ್ಲಿ ದುಃಖದ ಛಾಯೆ ಮೂಡಿಸಿದ್ದು, ಹಿರಿಯ ಪತ್ರಕರ್ತರೊಬ್ಬರ ನಿರ್ಗಮನದಿಂದ ಅಕ್ಷರ ಲೋಕ ಬಡವಾಗಿದೆ.

ಕಳೆದ ಕೆಲವು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ನಂಜುಂಡಪ್ಪ ಅವರು ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ, ವೈದ್ಯರ ಚಿಕಿತ್ಸೆಯೂ ಫಲಕಾರಿಯಾಗದೆ ಅವರು ಕೊನೆ ಉಸಿರೆಳೆದಿದ್ದಾರೆ. ಮೃತರು ಪತ್ನಿ ಉಮಾ ಭಂಡಿಗಡಿ, ಸಹೋದರರು ಹಾಗೂ ಅಪಾರ ಬಂಧುಮಿತ್ರರನ್ನು ಅಗಲಿದ್ದಾರೆ.

ಪತ್ರಿಕೆಯೇ ಬದುಕು, ಅಕ್ಷರಗಳೇ ಉಸಿರು!:

ಪತ್ರಿಕೋದ್ಯಮವೆಂದರೆ ಕೇವಲ ಸುದ್ದಿಗಳನ್ನು ಪ್ರಕಟಿಸುವ ವೃತ್ತಿಯಲ್ಲ, ಅದೊಂದು ಬದ್ಧತೆ, ಜವಾಬ್ದಾರಿ ಮತ್ತು ಜನರೊಂದಿಗಿನ ನಂಟು ಎಂಬುದನ್ನು ತಮ್ಮ ಬದುಕಿನ ಮೂಲಕ ತೋರಿಸಿಕೊಟ್ಟವರು ಭಂಡಿಗಡಿ ನಂಜುಂಡಪ್ಪ.

ಹಲವು ದಶಕಗಳಿಂದ ‘ವಾಯ್ಸ್ ಆಫ್ ಶಿವಮೊಗ್ಗ’ ಪತ್ರಿಕೆಯನ್ನು ನಿರಂತರವಾಗಿ ಪ್ರಕಟಿಸುತ್ತಾ ಬಂದ ಅವರು, ಪತ್ರಿಕೆಯ ಬಗ್ಗೆ ಹೊಂದಿದ್ದ ಪ್ರೀತಿ ಮತ್ತು ಕಾಳಜಿ ಅಪಾರವಾದದ್ದು. ಇಂದಿನ ತಂತ್ರಜ್ಞಾನದ ಯುಗದಲ್ಲಿ ಎಲ್ಲವೂ ಸುಲಭವಾಗಿ ದೊರೆಯುತ್ತಿದ್ದರೂ, ಪತ್ರಿಕೆಯ ಪ್ರತಿಯೊಂದು ಸಂಚಿಕೆಯೂ ಓದುಗರ ಕೈ ಸೇರಬೇಕು ಎಂಬ ಕಾಳಜಿಯಿಂದ ಸ್ವತಃ ಅಂಚೆ ಚೀಟಿ ಅಂಟಿಸಿ ಪತ್ರಿಕೆಗಳನ್ನು ಚಂದಾದಾರರ ಮನೆ ಬಾಗಿಲಿಗೆ ಕಳುಹಿಸುತ್ತಿದ್ದ ಅವರ ವೃತ್ತಿನಿಷ್ಠೆ ನಿಜಕ್ಕೂ ಮಾದರಿಯಾದದ್ದು.

ಪತ್ರಿಕೆ ಪ್ರಕಟಿಸುವುದು ಅವರ ಪಾಲಿಗೆ ಕೇವಲ ವೃತ್ತಿಯಾಗಿರಲಿಲ್ಲ, ಅದು ಅವರ ಬದುಕಿನ ಅವಿಭಾಜ್ಯ ಅಂಗವಾಗಿತ್ತು. ಪತ್ರಿಕೆಯನ್ನು ಉಳಿಸಬೇಕು, ಓದುಗರಿಗೆ ತಲುಪಿಸಬೇಕು ಎಂಬ ಅವರ ನಿರಂತರ ಪ್ರಯತ್ನದ ಹಿಂದೆ ಅಕ್ಷರಗಳ ಮೇಲಿನ ಅಪಾರ ಪ್ರೀತಿ ನಂಜುಂಡಪ್ಪನವರಲ್ಲಿ‌ ಎದ್ದು ಕಾಣುತ್ತಿತ್ತು.

ಹಿರಿಯಣ್ಣನಂತೆ ಎಲ್ಲರನ್ನೂ ಪ್ರೀತಿಸಿದ ಸ್ನೇಹಜೀವಿ :

ಸರಳ ಸ್ವಭಾವ, ಆತ್ಮೀಯ ಒಡನಾಟ ಮತ್ತು ಸ್ನೇಹಪರ ವ್ಯಕ್ತಿತ್ವದಿಂದ ಎಲ್ಲರ ಮನಸ್ಸಿನಲ್ಲಿ ಸ್ಥಾನ ಪಡೆದಿದ್ದ ನಂಜುಂಡಪ್ಪ ಅವರು ಸಹೋದ್ಯೋಗಿಗಳ ಪಾಲಿಗೆ ಹಿರಿಯಣ್ಣನಂತಿದ್ದರು. ಯಾರೊಂದಿಗೂ ವಿರಸ ಕಟ್ಟಿಕೊಳ್ಳದೆ, ಎಲ್ಲರೊಂದಿಗೂ ಆತ್ಮೀಯವಾಗಿ ಬೆರೆಯುತ್ತಿದ್ದ ಅವರು ಪತ್ರಕರ್ತರ ಸಂಘಟನೆಯ ಚಟುವಟಿಕೆಗಳಲ್ಲಿಯೂ ಸಕ್ರಿಯವಾಗಿ ಪಾಲ್ಗೊಳ್ಳುತ್ತಿದ್ದರು.

ಪತ್ರಿಕಾ ಸಂಪಾದಕರ ಸಂಘದ ಅಧ್ಯಕ್ಷರಾಗಿ ಹಾಗೂ ರಾಷ್ಟ್ರೀಯ ಮಂಡಳಿಯ ಸದಸ್ಯರಾಗಿ ಹಲವು ವರ್ಷಗಳ ಕಾಲ ಸೇವೆ ಸಲ್ಲಿಸಿದ್ದ ಅವರು, ಪತ್ರಿಕಾ ಕ್ಷೇತ್ರದ ಬೆಳವಣಿಗೆಗೆ ತಮ್ಮದೇ ಆದ ಕೊಡುಗೆ ನೀಡಿದ್ದಾರೆ. ಸಹ ಪತ್ರಕರ್ತರಿಗೆ ಪ್ರೋತ್ಸಾಹ ನೀಡುತ್ತಾ, ಸಂಘಟನೆಯ ಚಟುವಟಿಕೆಗಳಲ್ಲಿ ಭಾಗವಹಿಸುತ್ತಾ ಪತ್ರಕರ್ತರ ಸಮುದಾಯದೊಂದಿಗೆ ಗಾಢವಾದ ಬಾಂಧವ್ಯವನ್ನು ಬೆಳೆಸಿಕೊಂಡಿದ್ದರು.

ಇಳಿ ವಯಸ್ಸಿನಲ್ಲಿಯೂ ಕ್ರೀಡಾಕೂಟಗಳಲ್ಲಿ ಉತ್ಸಾಹದಿಂದ ಪಾಲ್ಗೊಂಡು ಬಹುಮಾನಗಳನ್ನು ಗೆಲ್ಲುತ್ತಿದ್ದದ್ದು ಅವರ ಜೀವನೋತ್ಸಾಹಕ್ಕೆ ಸಾಕ್ಷಿಯಾಗಿತ್ತು.

ಮರೆಯಾಗಿದ್ದು ವ್ಯಕ್ತಿಯಲ್ಲ, ಶಿವಮೊಗ್ಗ ಜಿಲ್ಲಾ ಪತ್ರಿಕೋದ್ಯಮದ ಶಕ್ತಿ.:

ಕಾಲ ಬದಲಾಯಿತು, ತಂತ್ರಜ್ಞಾನ ಬದಲಾಯಿತು, ಪತ್ರಿಕೋದ್ಯಮದ ಸ್ವರೂಪವೂ ಬದಲಾಯಿತು. ಆದರೆ, ಪತ್ರಿಕೆಯ ಮೇಲಿನ ಪ್ರೀತಿ, ವೃತ್ತಿಯ ಮೇಲಿನ ನಿಷ್ಠೆ ಮತ್ತು ಓದುಗರೊಂದಿಗಿನ ಸಂಬಂಧವನ್ನು ಕಾಪಾಡಿಕೊಂಡು ಬಂದ ನಂಜುಂಡಪ್ಪ ಅವರಂತಹ ಹಿರಿಯ ಪತ್ರಕರ್ತರು ಇಂದಿನ ಪೀಳಿಗೆಗೆ ಸ್ಫೂರ್ತಿಯಾಗಿದ್ದಾರೆ.

ಅವರು ಪ್ರಕಟಿಸಿದ ಪತ್ರಿಕೆಯ ಪ್ರತಿಯೊಂದು ಸಂಚಿಕೆಯ ಹಿಂದೆಯೂ ಅವರ ಶ್ರಮವಿತ್ತು, ಪ್ರತಿಯೊಂದು ಅಕ್ಷರದ ಹಿಂದೆಯೂ ಅವರ ಬದ್ಧತೆಯಿತ್ತು. ಪತ್ರಿಕೆಯೊಂದು ನಿರಂತರವಾಗಿ ಓದುಗರನ್ನು ತಲುಪಬೇಕೆಂಬ ಅವರ ಕಾಳಜಿ, ಪತ್ರಿಕೋದ್ಯಮದ ಮೇಲಿನ ಅವರ ನಿಷ್ಠೆಯನ್ನು ಸದಾ ನೆನಪಿಸುವಂತಿದೆ.

ಇಂದು ನಂಜುಂಡಪ್ಪ ಅವರು ನಮ್ಮೊಂದಿಗಿಲ್ಲ. ಆದರೆ, ಅವರು ಪ್ರೀತಿಸಿದ ಅಕ್ಷರಗಳು, ಬೆಳೆಸಿದ ಸಂಬಂಧಗಳು ಮತ್ತು ಪತ್ರಿಕಾ ಕ್ಷೇತ್ರಕ್ಕೆ ನೀಡಿದ ಕೊಡುಗೆಗಳು ಸದಾ ಜೀವಂತವಾಗಿರಲಿವೆ.

ಅವರ ನಿಧನಕ್ಕೆ ಗಣ್ಯರು, “ಕಾರ್ಯನಿರತ ಪತ್ರಕರ್ತರ ಸಂಘ” ಶಿವಮೊಗ್ಗ ಜಿಲ್ಲಾ ಫಟಕದ ಅಧ್ಯಕ್ಷರು ಮತ್ತು ಸದಸ್ಯರು, ರಾಜಕೀಯ ಮುಖಂಡರು ಹಾಗೂ ಸಮಾಜದ ವಿವಿಧ ಕ್ಷೇತ್ರಗಳ ಗಣ್ಯರು ಸಂತಾಪ ಸೂಚಿಸಿದ್ದಾರೆ.

ಹಿರಿಯ ಪತ್ರಕರ್ತರೊಬ್ಬರ ಅಗಲಿಕೆಯಿಂದ ಶಿವಮೊಗ್ಗದ ಪತ್ರಿಕಾ ಲೋಕದಲ್ಲಿ ತುಂಬಲಾರದ ನಷ್ಟವಾಗಿದೆ. ಅವರ ಆತ್ಮಕ್ಕೆ ಚಿರಶಾಂತಿ ದೊರಕಲಿ, ಕುಟುಂಬದವರಿಗೆ ಹಾಗೂ ಬಂಧುಮಿತ್ರರಿಗೆ ಈ ದುಃಖವನ್ನು ಭರಿಸುವ ಶಕ್ತಿ ದೊರೆಯಲಿ.

ಅಕ್ಷರಗಳೊಂದಿಗೆ ಬದುಕಿದ ಹಿರಿಯ ಜೀವಿಗೆ ಅಕ್ಷರಗಳ ಮೂಲಕವೇ ಅಂತಿಮ ನಮನ…

ಭಂಡಿಗಡಿ ನಂಜುಂಡಪ್ಪ ಅವರೇ, ನಿಮ್ಮ ಪಯಣ ಮುಗಿದಿರಬಹುದು; ಆದರೆ ಪತ್ರಿಕಾ ಲೋಕದಲ್ಲಿ ನೀವು ಮೂಡಿಸಿದ ಹೆಜ್ಜೆಗುರುತುಗಳು ಎಂದಿಗೂ ಅಳಿಯುವುದಿಲ್ಲ.

ಭಾವಪೂರ್ಣ ಶ್ರದ್ಧಾಂಜಲಿ. ಓಂ ಶಾಂತಿ.

ಸುಧೀರ್ ವಿಧಾತ & ಟೀಮ್.
“ಅಶ್ವಸೂರ್ಯ ನ್ಯೂಸ್” ಶಿವಮೊಗ್ಗ,