₹13 ಲಕ್ಷಕ್ಕೆ ಸುಪಾರಿ.! ಪತಿಯ ಸ್ನೇಹಿತೆಯನ್ನು ಕೊಲ್ಲಿಸಿದ ಆರೋಪ, ಪತ್ನಿ ಸೇರಿ ನಾಲ್ವರ ಬಂಧನ.
news.ashwasurya.in
ಅಶ್ವಸೂರ್ಯ | ಗೊಂಡಿಯಾ : ಪತಿಯೊಂದಿಗೆ ಸಂಬಂಧ ಹೊಂದಿದ್ದಾರೆ ಎಂಬ ಅನುಮಾನದಿಂದ ಮಹಿಳೆಯೊಬ್ಬರು ತನ್ನ ಪತಿಯ ಸ್ನೇಹಿತೆಯನ್ನು ಕೊಲೆ ಮಾಡಲು ₹13 ಲಕ್ಷಕ್ಕೆ ಸುಪಾರಿ ನೀಡಿರುವ ಆರೋಪ ಮಹಾರಾಷ್ಟ್ರದ ಗೊಂಡಿಯಾ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿತ ಪತ್ನಿ ಸೇರಿದಂತೆ ನಾಲ್ವರನ್ನು ಪೊಲೀಸರು ಬಂಧಿಸಿದ್ದು, ಇನ್ನಿಬ್ಬರು ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ.ಕೊಲೆಯಾದವರು 35 ವರ್ಷದ ವರ್ಷಾ ತುರ್ಕರ್. ಅವರು ವಿಮಾನಯಾನ ಸಂಸ್ಥೆಯೊಂದರಲ್ಲಿ ಉದ್ಯೋಗಿಯಾಗಿದ್ದರು. ನವೆಂಬರ್ 14ರಂದು ಸಂಜೆ 5.30ರಿಂದ 6 ಗಂಟೆಯ ನಡುವೆ ತಿರೋಡಾದಿಂದ ತನ್ನ ಪುರುಷ ಸ್ನೇಹಿತನೊಂದಿಗೆ ಹಿಂದಿರುಗುತ್ತಿದ್ದಾಗ ಬೊಂಡ್ರಾಣಿ ಗ್ರಾಮದ ಅರಣ್ಯ ಪ್ರದೇಶದಲ್ಲಿರುವ ಶಿವನ ದೇವಾಲಯದ ಸಮೀಪ ಮೂವರು ಬೈಕ್ ಸವಾರರು ಅವರ ಮೇಲೆ ದಾಳಿ ನಡೆಸಿದ್ದರು. ಹೊಟ್ಟೆ ಮತ್ತು ಬೆನ್ನಿನ ಭಾಗಕ್ಕೆ ಹಲವು ಬಾರಿ ಚೂರಿಯಿಂದ ಇರಿಯಲಾಗಿದ್ದು, ದಾಳಿಯಲ್ಲಿ ವರ್ಷಾ ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ.

ಪತಿಯೊಂದಿಗಿನ ಸಂಬಂಧದ ಅನುಮಾನವೇ ಹತ್ಯೆಗೆ ಕಾರಣವಾಯ್ತಾ.?
ಪೊಲೀಸರ ತನಿಖೆಯ ಪ್ರಕಾರ, 41 ವರ್ಷದ ಮೋನಾ ಅಗರ್ವಾಲ್ ತನ್ನ ಪತಿ ನಿತೇಶ್ ಅಗರ್ವಾಲ್ ಮತ್ತು ವರ್ಷಾ ತುರ್ಕರ್ ನಡುವೆ ಸಂಬಂಧವಿದೆ ಎಂದು ಅನುಮಾನಿಸಿದ್ದರು. ಇದೇ ಕಾರಣಕ್ಕೆ ವರ್ಷಾ ಅವರನ್ನು ಕೊಲೆ ಮಾಡಲು ಸಂಚು ರೂಪಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ತಮ್ಮ ಹೆಸರಿನಲ್ಲಿ ನೋಂದಣಿಯಾಗಿದ್ದ ಕಾರಿನಲ್ಲಿರುವ ಜಿಪಿಎಸ್ ಟ್ರ್ಯಾಕಿಂಗ್ ವ್ಯವಸ್ಥೆಯನ್ನು ಬಳಸಿಕೊಂಡು ಪತಿಯ ಚಲನವಲನಗಳ ಮೇಲೆ ನಿಗಾ ಇಟ್ಟಿದ್ದರು. ಈ ಮಾಹಿತಿಯ ಮೂಲಕ ದಾಳಿಕೋರರಿಗೆ ವರ್ಷಾ ಇರುವ ಸ್ಥಳವನ್ನು ಪತ್ತೆಹಚ್ಚಲು ನೆರವಾಗಿದ್ದಾರೆ ಎಂದು ತನಿಖಾಧಿಕಾರಿಗಳು ಆರೋಪಿಸಿದ್ದಾರೆ.
ಮೋನಾ ಅವರ ನೆರೆಮನೆಯವರಾದ ಕುನಾಲ್ ಕುಂಭಲ್ಕರ್ ಮೂಲಕ ಕೊಲೆಯ ಸಂಚು ರೂಪಿಸಲಾಗಿದೆ ಎನ್ನಲಾಗಿದೆ. ಕುನಾಲ್, ಕ್ರಿಮಿನಲ್ ಹಿನ್ನೆಲೆಯುಳ್ಳ ಶಾರುಖ್ ಪಠಾಣ್ ಅವರನ್ನು ಸಂಪರ್ಕಿಸಿ ₹13 ಲಕ್ಷಕ್ಕೆ ಸುಪಾರಿ ನಿಗದಿಪಡಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಬಳಿಕ ಶಾರುಖ್ ದಾಳಿ ನಡೆಸಲು ಮೂವರನ್ನು ನೇಮಿಸಿಕೊಂಡಿದ್ದರು ಎನ್ನಲಾಗಿದೆ.

ದೀಪಾವಳಿ ರಜೆಗಾಗಿ ತವರಿಗೆ ಬಂದಿದ್ದ ವರ್ಷಾ ಹೆಣವಾಗಿ ಹೊದ್ಲು.!
ಪುಣೆ ಜಿಲ್ಲೆಯ ಧನೋರಿ ನಿವಾಸಿಯಾಗಿದ್ದ ವರ್ಷಾ, ದೀಪಾವಳಿ ರಜೆ ಹಿನ್ನೆಲೆಯಲ್ಲಿ ಮಧ್ಯಪ್ರದೇಶದ ಬಾಲಾಘಾಟ್ ಜಿಲ್ಲೆಯ ಕಿನ್ಹಿ ಗ್ರಾಮದ ತಮ್ಮ ತವರು ಮನೆಗೆ ಬಂದಿದ್ದರು. ನವೆಂಬರ್ 14ರಂದು ನಿತೇಶ್ ಅವರೊಂದಿಗೆ ತಿರೋಡಾಗೆ ತೆರಳಿ ವಾಪಸ್ ಬರುತ್ತಿದ್ದಾಗ ಈ ದಾಳಿ ನಡೆದಿತ್ತು.
200 ಸಿಸಿಟಿವಿ ದೃಶ್ಯಾವಳಿ ಪರಿಶೀಲಿಸಿ ಪ್ರಕರಣ ಭೇದಿಸಿದ ಪೊಲೀಸರು.
ಪ್ರಕರಣದ ತನಿಖೆಗಾಗಿ ಗೊಂಡಿಯಾ ಪೊಲೀಸರು ಆರು ವಿಶೇಷ ತಂಡಗಳನ್ನು ರಚಿಸಿದ್ದರು. ಅಪರಾಧ ನಡೆದ ಸ್ಥಳದಿಂದ ತಿರೋಡಾ, ಖೈರ್ಲಾಂಜಿ, ವಾರಾಸಿಯೋನಿ, ಬಾಲಾಘಾಟ್ ಮತ್ತು ಗೊಂಡಿಯಾ ಸಂಪರ್ಕಿಸುವ ಮಾರ್ಗಗಳಲ್ಲಿದ್ದ ಸುಮಾರು 200 ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದರು.
ದೃಶ್ಯಾವಳಿಗಳಲ್ಲಿ ಮೂವರು ವ್ಯಕ್ತಿಗಳು ಬೈಕ್ನಲ್ಲಿ ನಿತೇಶ್ ಅವರ ನಾಲ್ಕು ಚಕ್ರದ ವಾಹನವನ್ನು ಹಿಂಬಾಲಿಸುತ್ತಿರುವುದು ಕಂಡುಬಂದಿತ್ತು. ಸಿಸಿಟಿವಿ ದೃಶ್ಯಗಳು, ತಾಂತ್ರಿಕ ವಿಶ್ಲೇಷಣೆ ಮತ್ತು ಗುಪ್ತಚರ ಮಾಹಿತಿಯ ಆಧಾರದಲ್ಲಿ ಪೊಲೀಸರು ಆರೋಪಿಗಳ ಸುಳಿವು ಪತ್ತೆಹಚ್ಚಿದರು.
ನವೆಂಬರ್ 19ರಂದು ಮೂರ್ತಿ ಗ್ರಾಮದ ಇಮ್ರಾನ್ ಕರೀಂ ಶೇಖ್ (26) ಎಂಬಾತನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಕೊಲೆ ಸಂಚಿನ ಕುರಿತು ಮಾಹಿತಿ ಲಭಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ವಿಚಾರಣೆ ವೇಳೆ ಮೋನಾ ಅಗರ್ವಾಲ್ ಮತ್ತು ಕುನಾಲ್ ಕುಂಭಲ್ಕರ್ ಅವರ ಪಾತ್ರದ ಬಗ್ಗೆಯೂ ಮಾಹಿತಿ ಬಹಿರಂಗವಾಗಿದೆ ಎನ್ನಲಾಗಿದೆ.

ನಾಲ್ವರ ಬಂಧನ, ಇಬ್ಬರು ಎಸ್ಕೇಪ್.!
ಕೊಲೆ ದಾಳಿಯಲ್ಲಿ ಭಾಗಿಯಾಗಿದ್ದಾರೆ ಎನ್ನಲಾದ ಇಮ್ರಾನ್ ಶೇಖ್ (26), ನಲನ್ ಅಲಿಯಾಸ್ ನಯ್ಲನ್ ಶೇಖ್ (24) ಮತ್ತು ಕೃಷ್ ರಾವತ್ (19) ಮೂರ್ತಿ ಗ್ರಾಮದ ಸಂಜಯ್ ನಗರ ನಿವಾಸಿಗಳೆಂದು ಪೊಲೀಸರು ಗುರುತಿಸಿದ್ದಾರೆ.
ಮೋನಾ ಅಗರ್ವಾಲ್ ಸೇರಿದಂತೆ ನಾಲ್ವರನ್ನು ಬಂಧಿಸಲಾಗಿದೆ. ಇನ್ನಿಬ್ಬರು ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ. ಬಂಧಿತ ಆರೋಪಿಗಳನ್ನು ಮುಂದಿನ ತನಿಖೆಗಾಗಿ ದಾವನಿವಾಡಾ ಪೊಲೀಸರಿಗೆ ಹಸ್ತಾಂತರಿಸಲಾಗಿದೆ ಎಂದು ವರದಿಯಾಗಿದೆ. ಪ್ರಕರಣದ ಕುರಿತು ಹೆಚ್ಚಿನ ತನಿಖೆ ಮುಂದುವರಿದಿದೆ.


