ಜೇಬಿನಲ್ಲಿದ್ದ 200 ರೂಪಾಯಿ ನಂಬಿಕೊಂಡು ಮಗಳ ಬರ್ತ್‌ಡೇಗೆ ಕೇಕ್ ತರಲು ಹೊರಟಿದ್ದ ಬಡ ತಂದೆಗೆ 250 ರೂಪಾಯಿ ದಂಡ ಹಾಕಿದ ಪೊಲೀಸರು.! ಆಮೇಲೆ ಎನಾಯ್ತು.?
news.ashwasurya.in
ಅಶ್ವಸೂರ್ಯ/ಕೊಟ್ಟಾಯಂ : ಮಗಳ ನಾಲ್ಕನೇ ವರ್ಷದ ಹುಟ್ಟುಹಬ್ಬಕ್ಕೆ ಸಿಹಿತಿಂಡಿ ಖರೀದಿಸಲು ಕೇವಲ 200 ರೂಪಾಯಿ ಹಿಡಿದು ಬಂದಿದ್ದ ಬಡ ತಂದೆಯೊಬ್ಬರಿಗೆ ದಂಡ ವಿಧಿಸಿದ ಮೋಟಾರು ವಾಹನ ಇಲಾಖೆ (MVD) ಅಧಿಕಾರಿಗಳು, ಬಳಿಕ ಆತನ ದುಃಖದ ಕಥೆ ಕೇಳಿ ಕರಗಿ, ತಮ್ಮದೇ ಜೇಬಿನಿಂದ ದಂಡ ಪಾವತಿಸಿ ಮಗಳಿಗೆ ಕೇಕ್ ಹಾಗೂ ಹೊಸ ಬಟ್ಟೆ ಉಡುಗೊರೆ ನೀಡಿ ಮಾನವೀಯತೆ ಮೆರೆದ ಘಟನೆ ಕೇರಳದ ಕೊಟ್ಟಾಯಂನಲ್ಲಿ ನಡೆದಿದೆ.
ಕೊಟ್ಟಾಯಂನಲ್ಲಿ ಇಂಟರ್‌ಸೆಪ್ಟರ್ ಕರ್ತವ್ಯದಲ್ಲಿದ್ದ ಎಸ್‌ಐ ಸಿಜೊ ರವೀಂದ್ರನ್ ಮತ್ತು ಅವರ ಎಂವಿಡಿ (MVD) ತಂಡವು ಎರುಮೇಲಿ ಮೂಲದ ಸುಜಿತ್ ಎಂಬುವವರ ಮಗಳ ಹುಟ್ಟುಹಬ್ಬವನ್ನು ಸಂಭ್ರಮದಾಯಕವಾಗಿಸಿದ ಅಧಿಕಾರಿಗಳು. ಅಕ್ಟೋಬರ್ 16ರಂದು ಎರುಮೇಲಿ ಮತ್ತು ಕಾಂಜಿರಪ್ಪಳ್ಳಿ ನಡುವೆ ಎಂವಿಡಿ ಅಧಿಕಾರಿಗಳು ನಿಯಮಿತ ವಾಹನ ತಪಾಸಣೆ ನಡೆಸುತ್ತಿದ್ದರು. ಈ ವೇಳೆ ಸುಜಿತ್ ಅವರು ಚಲಾಯಿಸುತ್ತಿದ್ದ ದ್ವಿಚಕ್ರ ವಾಹನದಲ್ಲಿ ಸೈಡ್ ಮಿರರ್ ಇಲ್ಲದಿರುವುದು ಹಾಗೂ ಹಿಂಬದಿ ಸವಾರ ಹೆಲ್ಮೆಟ್ ಧರಿಸದಿರುವುದನ್ನು ಕಂಡು ಅಧಿಕಾರಿಗಳು ವಾಹನವನ್ನು ತಡೆದು 250 ರೂಪಾಯಿ ದಂಡ ವಿಧಿಸಿದರು.
ದಂಡದ ರಸೀದಿ ನೋಡುತ್ತಿದ್ದಂತೆ ಚಾಲಕ ಸುಜಿತ್ ತೀವ್ರ ನಿರಾಶೆಯಿಂದ ಕಣ್ಣೀರಿಡಲು ತೊಡಗಿದರು. ಇದನ್ನು ಕಂಡು ಅನುಮಾನಗೊಂಡ ಅಧಿಕಾರಿಗಳು ವಿಚಾರಿಸಿದಾಗ ಕಣ್ಣೀರಿನ ಕಥೆ ಬಯಲಾಯಿತು.
“ಕಳೆದ ಮೂರು ವಾರಗಳಿಂದ ನನಗೆ ಯಾವುದೇ ಕೆಲಸವಿಲ್ಲ. ಕೈಯಲ್ಲಿ ಕೇವಲ 200 ರೂಪಾಯಿ ಮಾತ್ರ ಇದೆ. ಇಂದು ನನ್ನ 4 ವರ್ಷದ ಮಗಳ ಹುಟ್ಟುಹಬ್ಬವಿದ್ದು, ಆ ಹಣದಲ್ಲಿ ಸಿಹಿತಿಂಡಿ ಖರೀದಿಸಲು ಹೊರಟಿದ್ದೆ” ಎಂದು ಸುಜಿತ್ ತಮ್ಮ ಅಸಹಾಯಕತೆಯನ್ನು ತೋಡಿಕೊಂಡರು. ಮಾನಸಿಕವಾಗಿ ನೊಂದಿದ್ದ ಬಡ ತಂದೆಯ ನೋವನ್ನು ಅರ್ಥಮಾಡಿಕೊಂಡ ಎಸ್‌ಐ ಸಿಜೊ ರವೀಂದ್ರನ್ ಹಾಗೂ ತಂಡ, ತಕ್ಷಣವೇ ಸರ್ಕಾರದ ದಂಡದ ಮೊತ್ತ 250 ರೂಪಾಯಿಯನ್ನು ತಮ್ಮ ಸ್ವಂತ ಜೇಬಿನಿಂದಲೇ ಪಾವತಿಸಿದರು.
ಅಷ್ಟಕ್ಕೇ ಪೊಲೀಸ್ ಅಧಿಕಾರಿಗಳು ಸುಜಿತ್ ಅವರನ್ನು ಎರುಮೇಲಿ ಪಟ್ಟಣದ ಬೇಕರಿಗೆ ಕರೆದೊಯ್ದು ಮಗಳು ‘ವೈಗಾ’ಳಿಗೆ ಬೇಕಾದ ಕೇಕ್, ಸಿಹಿತಿಂಡಿ ಹಾಗೂ ಹೊಸ ಬಟ್ಟೆಗಳನ್ನು ತಮ್ಮ ಸ್ವಂತ ಖರ್ಚಿನಲ್ಲಿ ಖರೀದಿಸಿಕೊಟ್ಟರು. ಬಳಿಕ ನೇರವಾಗಿ ಸುಜಿತ್ ಅವರ ಮನೆಗೆ ತೆರಳಿ, ಕುಟುಂಬಸ್ಥರ ಸಮ್ಮುಖದಲ್ಲೇ ಮಗುವಿಗೆ ಶುಭಕೋರಿ ಕೇಕ್ ಕತ್ತರಿಸಿ ಸಂಭ್ರಮಿಸಿದರು.
ಮೋಟಾರು ವಾಹನ ಇಲಾಖೆ ಹಾಗೂ ಪೊಲೀಸ್ ಅಧಿಕಾರಿಗಳ ಈ ಅಪರೂಪದ ಮಾನವೀಯ ಸ್ಪಂದನೆಗೆ ಮತ್ತು ಉದಾರತೆಗೆ ಸಾರ್ವಜನಿಕ ವಲಯ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
